SERIKALI YATANGAZA VITA KWA WANAOTUMIA DINI KUVURUGA AMANI‏

Mwanga.

SERIKALI imesema inaanza kuchukua hatua dhidi ya watu wanaotumia

mwavuli wa dini kuleta vurugu zinazotishia amani na usalama wa nchi.

Makamu wa rais Dk. Mohamed Gharib Billal, amesema hayo leo wakati wa

kusherehekea sikukuu ya Eid el Hajji, ambayo kitaifa imeathimishwa

wilyani Mwanga mkoani Kilimanjaro.

Akihutubia baraza la Eid, katika masjidi ya Vuchama wilyani Mwanga,

Dk. Billal alisema hivi karibuni kumeibuka wimbi la watu

wanaojihusisha na vurugu za kidini ambazo chanzo chake kimekuwa ni

mgogoro miongoni mwa waumini wa dini.

Dk. Billal alisema kwa kiasi kikubwa vurugu hizo zimechafua sura y

taifa na kuleta taswira mbaya kwa jamii, kutokana na uvunjifu wa amani

na sheria za nchi unaofanywa na kikundi cha watu aliowaita wahuni.

Katika hatua nyingine Dk. Billal alisisitiza umuhimu wa taasisi za

dini kujiendesha kwa misingi ya kushauriana na kukubliana masuala

kadhaa ya kiutekelezaji na uendeshaji, ili kuepuka mifrakano

inayojitokeza hivi sasa miongoni mwa pande hizo.

Hata hivyo alisema serikali itaendelea kutimiza wajibu wake wa

kuhakikisa kwamba amani inalindwa ili iweze kuvisaidia vizazi vijavyo

na kuwa na nchi yenye uendelevu wa amani na utulivu.

Naye kaimu mufti wa Tanzania sheikh Ismail Habib Makusanya, wakati

akimkaribisha makamu wa rais kutoa hotuba yake aliiomba serikali

kuharakisha utafiti na uchunguzi utakaowezesha kubaini sababu za

kuvurugika kwa amani na utulivu uliopo.

Alisema kwa kiasi kikubwa migogoro inayojitokeza hivi sasa hususani

ile ya kidini ni tatizo linaloendelea kushika kasi hali inayopelekea

kuwepo uhraka wa kulitatua.

“Amani inaletwa na watu wakiwemo viongozi wa dini na serikali bila

kujali serikali hiyo ni ya Waislam au dini nyingine na serikali hii

sasa inatambua kuwa wajibu wake kuhakikisha kuwa amani inaendelea

kuwepo”, alisema.

Kaimu mufti alisisitiza serikali kutumia vyema vyombo vyake vya ulinzi

na usalama kuchunguza na kuchukua hatua dhidi ya wavunjifu wa amani

kwa haraka na kuchukua hatua zinazostahili kwa wale watakaobainika

kuhusika.

Wakati huo huo ameelezea tishio la aadhi ya wanasiasa wanaotumia

kivuli cha udini kuvuruga amani ya nchi na kutaka nao wachunguzwe na

kuchukuliwa hatua za kisheria kama raia wengine.

Sikukuu ya Eid el Hajji, imeambatana na uzinduzi wa wa msikiti wa

Vuchama pamoja na kuweka jiwe la msingi na uzinduzi wa mfuko wa

kujenga shule ya kituo cha Kiislam cha Vuchama.

Miradi hiyo inatarajiwa kugharimu shilingi bilioni 4.4, ambapo makamu

wa rais Dk. Billal alichangia shilingi milioni tano, akifuatiwa na

viongozi wengine akiwemo waziri mkuu mstaafu Cleopa Msuya, aliyetoa

shilingi milioni moja, huku mbunge wa Mwanga Profesa Jumanne Maghembe

alichangia shilingi milioni moja.