KMCM kinara mlipakodi Kilimanjaro

HOSPITALI ya Rufaa ya KCMC kwa mara ya tatu mfululizo imefanikiwa kushika nafasi ya kwanza katika kundi la walipakodi wakubwa wa Mkoa wa Kilimanjaro baada ya kutunukiwa cheti cha ubora na Mamlaka ya Mapato Tanzania (TRA). KCMC imeshika nafasi hiyo baada ya kushindanishwa na makampuni na taasisi mbalimbali katika eneo la walipakodi wakubwa wakati wa maadhimisho ya saba ya Siku ya Mlipakodi. Akizungumza baada ya kukabidhiwa cheti cha ubora, Mkurugenzi wa hospitali hiyo, Profesa Moshi Ntabaye, alisema uongozi wao umekuwa ukifanya kazi kwa karibu na serikali kwa kufuata taratibu na miongozo iliyowekwa. “Sisi katika kujipangia kwetu kazi, tumeona kwamba ni vyema kufuata miongozo ya serikali, mojawapo likiwa ni hili la kulipa kodi na tumeona tuwe wa mfano kulipa kodi zote zinazohitajika, na pili kama taasisi ya kanisa ni wajibu wetu kufundisha kwa mfano,” alisema Ntabaye. Alisema siri ya mafanikio ya ushindi wa hospitali hiyo pia ni uelewa kwa wafanyakazi na taasisi ya KCMC kutokana na ushiriki wao katika kulipa kodi, hasa ile inayotokana na makato katika mishahara yao pamoja na mapato mengine yanayopatikana katika hospitali hiyo. Ntabaye alisema wagonjwa wengi wanachangia huduma ya afya katika hospitali hiyo, hivyo ni wajibu wao kama viongozi kuona kiasi cha michango ya wananchi hao kinarudishwa kwao kwa njia ya kodi ili iweze kutumika katika kuboresha maeneo mengine. Alisema KCMC imekuwa ikichangia si chini ya sh milioni 150 kama kodi na ndiyo sababu imekuwa ikitunukiwa tuzo hiyo kwa mwaka wa tatu mfululizo. Meneja wa TRA, Patience Minga, alisema hospitali ya KCMC kuibuka mshindi wa jumla kwa walipakodi wakubwa, inadhihirisha kuwa huduma zitolewazo zinajali wateja wake. Minga alisema TRA kila mwaka imekuwa ikishindanisha makampuni na taasisi mbalimbali katika tuzo hizo, lengo likiwa ni kuongeza ufanisi katika suala zima la ulipaji kodi, ikiwa ni pamoja na kuleta hamasa ya umuhimu wa kulipa kodi. Chanzo;Tanzania Daima