SHAHIDI AELEZA MSHITAKIWA ALIVYOSAIDIWA KUTOROSHA TWIGA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MAHAKAMA ya Hakimu Mkazi Moshi, Kilimanjaro imeelezwa namna mshitakiwa namba moja katika kesi ya utoroshaji wa wanyama hai 130 wakiwamo twiga wanne kwenda nchi za Falme za Kiarabu, Kamran Ahmed, raia wa Pakistani alivyopewa idhini ya kufanikisha utoroshaji huo.

Shahidi wa 27 katika kesi hiyo namba 4 ya mwaka 2011, Inspekta Felichesm Lebule, ambaye ni ofisa upelelezi makosa ya kibinadamu (Assault Cases), makao makuu ya Polisi Dar es Salaam, aliieleza mahakama kuwa mshitakiwa alitumia Kampuni ya HAM Marketing ya jijini Dar es Salaam.

Akitoa ushahidi mbele ya Hakimu Mkazi Mfawidhi, Simon Kobelo, Lebule alidai kuwa upepelezi uliofanyika mkoani Arusha baada ya kufika ofisi za Scietest walipata nyaraka za Kampuni ya HAM Marketing inayomilikiwa na mshitakiwa namba mbili, Hawa Mang’unyuka.

Alieleza katika nyaraka hizo ambazo zilikabidhiwa kwao na msimamizi wa ofisi hiyo, Sylvanus Okudo, walipata maelezo yaliyoonyesha Hawa alitoa idhini kwa Kamran kwa niaba yake kuendesha shughuli za usafirishaji pindi awapo nje ya nchi.

“Kilimanjaro na Arusha tulianza kuja tarehe 1 mwezi Machi, 2011, tulifika pale Scietest Arusha ambapo tulibaini kuwa shughuli zote zilizokuwa zikifanywa na HAM Marketing zilikuwa zikifanywa na Kamran kwa niaba ya Hawa,” alieleza Lebule.

Mahakama ilielezwa kuwa baadaye timu ya wapelelezi iliyokuwa ikiongozwa na Kamishna Msaidizi wa Polisi (ACP), Bunga, ilitoka ofisi za Scietest na kwenda uwanja wa ndege wa kimataifa Kilimanjaro (KIA), ambako walifika kwenye Idara ya Forodha na kubaini haikuhusishwa katika usafirishaji huo.

Akiongozwa na Mwendesha Mashitaka, Wakili wa Serikali, Evetha Mushi, shahidi huyo aliieleza mahakama kuwa mpango mzima wa usafirishaji wa wanyama hao haukuhusisha idara hiyo kama sheria zinavyoelekeza na badala yake ulifanywa na mtu mmoja ambaye ni ofisa mstaafu wa Mamlaka ya Mapato nchini, aliyemtaja kwa jina la Rajabu Msakamali ambaye inadaiwa kwa sasa ni marehemu.

“Upelelezi wetu ulibaini kuwa Idara ya Forodha haikuwa na taarifa za zoezi hili, isipokuwa zoezi zima lilisimamiwa na ofisa mstaafu wa idara hiyo, Rajabu Msakamali. Msakamali alipostaafu tarehe 30 Juni mwaka 2010, alihama alipokuwa akiishi na kubadilisha namba zote za simu,” alieleza shahidi na kuongeza:

“Wakati tunamfuatilia huyo Msakamali, nilipokea barua kuhusu kustaafu kwa mtu huyu, ambayo ilitumwa kwa Mkurugenzi wa Upelelezi Taifa. Barua hii iliandikwa kutoka makao makuu ya TRA, tarehe 16 mwezi wa tisa mwaka 2011, yenye kumbukumbu namba TRA/CC/SN/66.”

Kesi hiyo imepangwa kuendelea Agosti 29, mwaka huu kwa upande wa jamhuri kuendelea kuendelea kutoa ushahidi wao.

Inaendelea huku mshitakiwa namba moja, Kamran, akiwa hajulikani aliko baada ya kushindwa kuhudhuria mahakamani hapo zaidi ya vikao vinne.

Mbali na Kamran Ahmed, washitakiwa wengine ni Hawa Mang’unyuka, Martin Kimathi na Michael Mrutu, ambao wanadaiwa kusafirisha wanyama hai Novemba 26, 2010 kwenda Qatar kupitia KIA.

Chanzo;Tanzania Daima